រដ្ឋលេខាធិការទីស្ដីការគណៈរដ្ឋមន្រ្តី ដឹកនាំ ក្រុមគ្រូពេទ្យស្ម័គ្រចិត្តចិនមកពិនិត្យ​ និង ព្យាបាលជំងឺបេះដូង​ ជូនកុមារអាយុក្រោម ១៤ឆ្នាំ​ នៅ ឃុំដូង ស្រុកបាទី


ព្រឹក ថ្ងៃព្រហស្បតិ៍ ១១ កើត ខែភទ្របទ ឆ្នាំច​ សំរឹទ្ធិស័ក ពុទ្ធសករាជ ២៥៦២​ ត្រូវនឹង ថ្ងៃទី២០ ខែកញ្ញា ឆ្នាំ២០១៨​ ឯកឧត្តម​ កឹម​ រ័ត្នវិសិទ្ធ​ រដ្ឋលេខាធិការទីស្ដីការគណៈរដ្ឋមន្រ្តី​ និង ជាប្រធានវេទិការសម្ព័ន្ធសង្គមស៊ីវិល​ លោក​ ទ័រ​ លីន​ ប្រធាននាយកដ្ឋានទំនាក់ទំនង អន្តរជាតិ​ មន្ទីរពេទ្យបេះដូង ខេត្តយូណាន​ នៃសាធារណៈរដ្ឋប្រជាមានិតចិន​ បានដឹកនាំក្រុមគ្រូពេទ្យស័្មគ្រចិត្តមកពី ប្រទេស​ចិន​ មកពិនិត្យ​ និងព្យាបាលជំងឺបេះដូងដល់ កុមារ អាយុក្រោម ១៤ឆ្នាំ​ នៅវិទ្យាល័យ គិត ម៉េង ប្រសាទ​ ស្ថិតឃុំដូង​ ស្រុកបាទី​ ខេត្តតាកែវ។

ឯកឧត្ដម​ កឹម​ រ័ត្នវិសិទ្ធ​ បានថ្លែងឲ្យដឹងថា​ នេះមិនមែនជាលើកទី ១ ទេ​ ដែលក្រុមគ្រូពេទ្យស័្មគ្រចិត្ត មកពីប្រទេសចិន​ បានដឹកនាំក្រុមគ្រូពេទ្យជំនាញបេះដូង មកពិនិត្យ​ និង ព្យាបាលជំងឺនេះជូនកុមារកម្ពុជា​ គឺជាលើកទី ១០ ហើយ​ ដែលក្រុមគ្រូពេទ្យចិនចុះមកពិនិត្យ​សុខភាព ផ្នែកបេះដូង​ ជូនកុមារកម្ពុជា​ និង ធ្លាប់បានបញ្ជូនកុមារកម្ពុជាជិត ៣០នាក់​ ដែលមានជំងឺបេះដូងធ្ងន់ធ្ងរ​ ពិបាកក្នុងការព្យាបាលទៅ​ ពិនិត្យ​ និង ព្យាបាល​ជំងឺបេះដូង​ នៅប្រទេសចិន​ ឲ្យបានជាសះស្បើយត្រលប់មកផ្ទះវិញដោយសុវត្ថិភាព​ នឹង គ្មានចំណាយថវិការអ្វីទាំងអស់​ គឺក្រុមគ្រូពេទ្យចិនជាអ្នករ៉ាប់រងរាល់ការចំណាយទាំងអស់​ក្នុងអំឡុង​ ពេលពិនិត្យ​ និង ព្យាបាល នៅក្នុងប្រទេសចិន៕